الدكتور حاتم الغزال: الـ4 ملاين تونسي اللي موش ملقحين باش “يبيلكونا”
تونس ــ الرأي الجديد
أكد الدكتور المختص في علم الأجنة، حاتم الغزال، على أهمية تكثيف عمليات التلقيح ضدّ فيروس “كورونا”، داعيا أيضا إلى إقرار إجبارية التطعيم على غرار عديد الدول الأوروبية.
وأضاف حاتم الغزال، في تدوينة نشرها على صفحته بموقع التواصل الإجتماعي “فيسبوك”، قائلا: “الكورونا في الأغلب باش ترجع تنتشر في تونس و عندنا 4 ملاين موش ملقحين باش يبيلكونا لو كان نزيدو نصبرو عليهم أكثر من هكا”.
وفيما يلي نصّ التدوينة:
هاذي الأرقام الرسمية في أمريكا و إلي فيها مقارنة بين الملقحين و غير الملقحين بإعتبار الشريحة العمرية.
تنجمو تفهمو بارشا حاجات من خلال الارقام هاذي.
● الجدول الأول فيه عدد الإصابات على كل100الف مواطن مهما كانت الأعراض خطيرة و إلا لا :
• تلاحظو أن الغير ملقحين بالازرق دائما عددهم أكبر بكثير من الملقحين و خاصة خاصة كبار السن إلي موش ملقّح معّرض7 مرات أكثر للإصابة من الملقح.
• الإستنتاج الأهم في الجدول هذا هو أن التلقيح يحمي من الإصابة و بالتالي من إنتشار العدوى و هاكا علاش الي يقلك التلقيح حرية شخصية غالط لان الحرية الشخصية تنتهي عند الضرر بالغير و الغير ملقح مضر بالمجتمع خاطرو يزيد في انتشار العدوى بصفة كبيرة.
● الصورة الثانية فيها عدد الإصابات الخطيرة على كل100الف ساكن و تلاحضو3حاجات مهمة برشا :
• الحاجة الاولى بديهية و الناس الكل تعرفها و هي ان التلقيح يخفض بنسبة كبيرة جدا في عدد الحالات الخطيرة خاصة عند كبار السن و لكن أيضا حتى عند الشباب.
• الحاجة الثانية و هي أن بعض الملقحين خاصة كبار السن رغم التلقيح ممكن يمرضوا بالحالات الخطيرة… وقتها أشكون السبب و هوما قاموا بواجبهم و لقحوا ؟ السبب هو الي تسبب في انتشار العدوى و هو في أغلب الحالات غير الملقح. و بالتالي من واجب الدولة حماية مواطنيها الملقحين من غير الملقحين.
• الحاجة الثالثة هي ان الأطفال سواء ملقحين او غير ملقحين نادرا جدا ما تجيهم الحالات الخطيرة و لذلك الهدف المهم من تلقيحهم هو حماية المجتمع من إنتشار العدوى و هو هدف سامي يلزم إنفسروه للاطفال باش يترباو على المسؤولية الإجتماعية و نفسروه لوالديهم باش ما يخافوش على صغارهم الي مازالو مالقحوش كيف يرجع إنتشار الوباء.
● مخ الهدرة : الكورونا في الأغلب باش ترجع تنتشر في تونس و عندنا 4 ملاين موش ملقحين باش يبيلكونا لو كان نزيدو نصبرو عليهم أكثر من هكا و لذا لابد من إجبارية التلقيح للجميع كيما قررت النمسا يوم أمس و باش اتّبعها برشى دول أخرى لو كان تبقى فيها نسب التلقيح منخفضة.
