طبيب تونسي: طوفان من جثث “كورونا” ستعمّ البلاد خلال الفترة المقبلة
تونس ــ الرأي الجديد (تدوينات)
لم يكن الدكتور زكريا بوقيرة، متفائلا بقدوم فصل الشتاء، حيث نشر تدوينة مطوّلة عبر صفحته الرسمية بموقع التواصل الاجتماعي، “فيسوك”، محذّرا من ارتفاع نسق انتشار فيروس “كورونا”، ملاحظا أنه على عكس ما يتصوّره العديد، فإن معدل الانتشار اليومي لفيروس “كورونا”، يقارب 3, 4% يوميا على عكس ما كان عليه خلال شهر مارس.
وتابع: ”ليوم دخلنا في فصل الشتاء … ولتوة ما خذينا حتى اجراء بش نوقفو الفيروس، الحكومة قالتلكم ما يهمنيش فيكم انتوما المسؤولين على رواحكم بش تموتو آلاف ومانيش بش نتدخل”.
وختم تدوينته بنوع من التحذير قائلا: ”ماعادش عنا وقت يا بش نوقفو الحكومة في القريب العاجل … طوفان متع جثث بش يعمّ البلاد بكلها”، مناديا بحجر صحي شامل لحماية التونسين من الوباء.
وفيما يلي نصّ التدوينة كاملة:
”على عكس ما يتصوروه بارشا عباد الفيروس الى حد الان مازال يسايس فينا. الى اليوم معدل الانتشار اليومي متع الفيروس يقارب 3, 4% يوميا على عكس ما كان عليه في مارس وين كان في معادل 20% اصابة يوميا.
الفرق هو الطقس. نعرف الي انا كنت من العباد الي معارضين نضرية الطقس يتدخل في انتشار الفيروس. ولكن هذا الموقف متع مارس وقت الي مازال كي بدا الانتشار ومازال ماعناش معطيات على انتشار الفيروس. وقتها طبيعي جدا اننا ما نبنيوش نظرية على حاجة موش مثبوتة. ليوم المعطيات موجودين.
لاحضنا انو في الصيف الفيروس انتشر اكثر في نصف الكورة الجنوبي و في الشتاء العكس انتشر في النصف الشمالي. هذا لواش زادا بلاد كيما السويد بالرغم من عدم استعمال الحجر الصحي صحيح ماتولها 10 مرات اكثر من جيرانها ولكن في الصيف نقص الانتشار وتوة رجع.
الطبيعة عطاتنا مهلة بش نتراجعو بش نكبسو رواحنا بش نمنعو العباد. اما القدر عطانا حكومة ومسؤولين مجرمين.
ليوم دخلنا في فصل الشتاء. ولتوة ما خذينا حتى اجراء بش نوقفو الفيروس.
الحكومة قالتلكم ما يهمنيش فيكم انتوما المسؤولين على رواحكم بش تموتو الاف ومانيش بش نتدخل.
البرلمان بخلاف زوز ثلاثة نواب كيما المنجي الرحوي حكاو على الموضوع وطالبو بالحجر الصحي الباقي مطفين الضو تقول ينوبو في شعب اخر.
رئيس الجمهورية الي في بالنا زعمة خارج المنظومة طلع frère مغروم بنظرية المؤامرة وما يهموش كان الشعب يموت. يتفرج فينا طيحين كي الذبان وهو في القصر متاعو يضرب في النوم. تقلي علاش هو؟ وشنوة دخلو؟ نقلك هو رئيس مجلس الامن القومي وهو الي يعلن على الحجر الصحي كان يحب.
و من الجيهة لخرى نحنا الشعب لتوة ساكتين, مصدومين, خايفين, مدبرمين. نشوفوا في الشيء ماشي لقدام ولتوة لا تحركنا.
هاكم شفتو القظات تحركو نهارين عملولهم سبيطار. علاش؟ على خاطر يخافو منهم. وعندهم الحق كي تحركو وخافو على رواحهم. مادام كل واحد نفسي نفسي من المعقول انهم يتحركو وعلى الاقل يمنعو منظوريهم.
المشكل موش انو القظات تحركو وخذاو امتيازات.
المشكل انو الشعب ما تحركش وخذاش حقو في الحياة.
الحكومة هذي بش تحرمنا من اعز العباد الي نحبوهم.
بش تقتللنا والدينا اقاربنا صحابنا.
كان بش نخليو الحكومة على راحتها ما فماش عايلة موش بش تتمس.
الشتاء جاء وجاب معاه المرض والموت.
ماعادش عنا وقت يا بش نوقفو الحكومة في القريب العاجل يا طوفان متع جثث بش يعم البلاد بكلها”.
